Ungt iðnaðarfólk í eldlínunni

Fulltrúar Íslands í ellefu iðngreinum öttu kappi í Gdansk í Póllandi fyrr í þessum mánuði. þar sem Euroskills, Evrópumót iðngreina, fór fram. Ísland hefur átt fulltrúa í keppninni – sem fer fram annað hvert ár – frá árinu 2007. Aldrei hafa þeir hins vegar verið fleiri.

Ellefu ungir og efnilegir fulltrúar tóku þátt í eftirfarandi greinum:

Íslensku keppendurnir á Euroskills stóðu sig frábærlega og fjórir einstaklingar fengu viðurkenningu fyrir sinn árangur og aðrir aðilar stóðu sig virkilega vel og voru framarlega á sínum sviðum. þar hlaut Irena Fönn Clemensdóttir frá Verkmenntaskólanum á Akureyri verðlaun fyrir að vera stigahæsti keppandinn í íslenska landsliðinu en hún keppti í hársnyrtiiðn. 

• Bakaraiðn – Finnur Guðberg Ívarsson, Hótel- og matvælaskólinn
• Framreiðsla – Finnur Gauti Vilhelmsson, Hótel- og matvælaskólinn
• Grafísk miðlun – Olivier Piotr Lis, Tækniskólinn
• Hársnyrtiiðn – Irena Fönn Clemmensen, Verkmenntaskólinn á Akureyri
• Iðnaðarstýringar – Benedikt Máni Finnsson, Tækniskólinn
• Kjötiðn – Bríet Berndsen Ingvadóttir, Hótel- og matvælaskólinn
• Matreiðsla – Hinrik Örn Halldórsson, Hótel- og matvælaskólinn
• Pípulagnir – Kristófer Daði Kárason, Tækniskólinn
• Rafeindavirkjun – Hlynur Karlsson, Tækniskólinn
• Rafvirkjun – Przemyslaw Patryk Slota, Verkmenntaskóli Austurlands
• Trésmíði – Van Huy Nguyen, Tækniskólinn

„Að taka þátt í Euroskills er mjög mikilvægt fyrir framþróun í iðnaði og ekki síður fyrir iðn -og verknám á Íslandi,“ segir Georg Páll Skúlason, formaður Verkiðnar eða Skills Iceland eins og samtökin heita á alþjóðavettvangi. „Samtökin vinna markvisst með stjórnvöldum og iðnaði til að undirbúa samfélagið undir störf framtíðarinnar. Hvert þátttökuland keppist um að þróa færni sína í hverri grein og þátttaka í Euroskills stuðlar einnig að öflugri starfsþróun þeirra iðn- og verkgreinakennara sem taka þátt í þjálfun okkar efnilegu fulltrúa sem keppa fyrir Íslands hönd,“ segir Georg Páll.