Vel heppnað þing ASÍ

Finnbjörn Hermannsson var endurkjörinn forseti ASÍ án mótframboðs. Þingið var vel heppnað að mati formanns FMA og fyrsti dagurinn opinn öllum og góðir fyrirlesarar þar. Könnun sem ASÍ gerði á meðal félagsmanna sinna sýnir eindregið að meirihluti félagsmanna er andvígur einkavæðingu á heilbrigðiskerfinu og að 60% félagsmanna telja að skipting auðlinda sé ranglát. Einungis 3% eru hlynnt orkuframleiðslu einkafyrirtækja.

Þrjár öflugar málefnahópar störfuðu á þinginu. Þeir hétu Þjónusta í þágu almennings, auðlindir í þágu þjóðar og samkeppni í þágu samfélags. Þessir hópar mörkuðu stefnu ASÍ í þessum málaflokkum en hana má lesa með því að smella á asi.is. Málefnavinnan á þinginu þótti afar vel heppnuð og mikill kraftur var í þingstörfum.

Þingið samþykkti fimm ályktanir. Ein var um stofnun framtíðarnefndar ASÍ en nefndin skal meðal annars fjalla um áskoranir og tækifæri vinnandi fólks í framtíðinni að því er snertir tæknibreytingar, lýðfræðilegar breytingar, sjálfvirknivæðingu og nýtingu gervigreindar.

Önnur ályktun var samþykkt um aðgerðir gegn einbeittri og síaukinni brotastarfsemi á vinnumarkaði.

Þingið ályktaði líka um húsnæðismál en þar segir að brýnt sé að stjórnvöld, bæði ríki og sveitarfélög, standi við gefin loforð í húsnæðismálum og hefji hér stórfellda og tafarlausa uppbyggingu, svo eitthvað sé nefnt.

Ályktun var einnig samþykkt um ráðstöfun séreignasparnaðar til greiðslu íbúðarhúsnæðis.

Loks samþykkti þingið ályktun um vaxtaokur og verðtryggingu.